Акафист святому апостолу Фоме

Кондак 1

Избранный самовидче Слова и свидетелю Его славный, даже до последних земли благовестивый веру твою: Егоже раны аз осязах, Сей есть Господь и Бог; обаче, яко и ныне созерцаяй нам незримая, за взыскующия веры молися, да зовем ти:

Радуйся, апостоле Фомо, неверованием добрым веру утвердивый.

Икос 1

Ангелом неведомое таинство познал еси, Плоть Бога жива дерзновенною десницею осязая, темже, ужасающеся и дивящеся, зовем ти:

Радуйся, яко дерзновение твое Бог предуведе,

Радуйся, яко на служение Свое тя предустави;

Радуйся, яко неверие твое не осуди;

Радуйся, яко веру твою утверди;

Радуйся, яко в лик апостольский тя избра;

Радуйся, яко стопы твоя во след Себе направи;

Радуйся, яко веща ти уста ко устом;

Радуйся, яко смирися пред любопытным перстом;

Радуйся, апостоле Фомо, неверованием добрым веру утвердивый.

Кондак 2

Словеса ваша о явлении Воскресшаго неудобоприятельна ми являются, вопияше Фома иным учеником, аще не вижу на руку Его язвы гвоздинныя, и не вложу перста моего в язвы гвоздинные, и вложу руку мою в ребра Его, не дерзну взывати Сему: Аллилуиа.

Икос 2

Разум недоразумеваемый догматов веры разумети ищуще, вопрошает в смятении: во двою естеству едино Лицо како Церковь мудрствует и воспевает? Обаче неверием твоим уверяеми в сем, взываем:

Радуйся, яко Христос един хлеб с тобою вкуси;

Радуйся, яко едино солнце над вами возсия;

Радуйся, яко хлебом истины многи насытил еси;

Радуйся, яко Солнце правды возлюбил еси;

Радуйся, яко един источник вы напои;

Радуйся, яко едина смоковница вама сень даде;

Радуйся, яко реки благодати источил еси;

Радуйся, яко не безплодная смоковница показался еси;

Радуйся, апостоле Фомо, неверованием добрым веру утвердивый.

Кондак 3

Силе Вышняго вся возможна суть, вопияше Фома, может бо и умершия воскрешати, обаче како смерти приобщися Сей, Емуже подобает воспевати: Аллилуиа.

Икос 3

Богоприятну Деву прозре младенец, во чреве Елисаветином сый, мы же, очи имуще, не зрим благая дела Господня, обаче слово Христово, апостолу реченное: блажени не видевшии и веровавшии, поминаем с надеждой, и тако сему взываем:

Радуйся, яко спасения возжелавый;

Радуйся, яко пророки чаянная узрел еси;

Радуйся, яко Адамом утраченная взыскавый;

Радуйся, яко Спасителя обрел еси;

Радуйся, Светом мира просвещенный;

Радуйся, яко Небо отверзеся ти;

Радуйся, яко Словом Отчим умудренный;

Радуйся, яко тайны Царствия открышася ти;

Радуйся, апостоле Фомо, неверованием добрым веру утвердивый.

Кондак 4

Бурю внутрь имею помышлений сумнительных, вопияше Фома, како бо во гроб положен бысть по водам Ходивый и Лазаря Воскресивый, Емуже аз желаю воспети : Аллилуиа.

Икос 4

Слышаше пастырие Ангелов, поющих Младенца Спаса, и, шедше убо, поклонишася Ему; мы же, уши имуще, не внемлем гласу Господню, обаче на твое предстательство, апостоле, уповаем и зовем ти:

Радуйся, в корабли со Христом ходивый;

Радуйся, по волнам Ходящу поклонивыйся;

Радуйся, мрежею Христовою уловленный;

Радуйся, на ковчег спасения ступивый;

Радуйся, яко воды неверствия не поглотиша ти;

Радуйся, яко буря сомнений тя не потопи;

Радуйся, яко Христос над бездною тя удержа;

Радуйся, яко десницу с язвою ти простре;

Радуйся, апостоле Фомо, неверованием добрым веру утвердивый.

Кондак 5

Боготечной звезде последоваша волсви, вопияше Фома, тако и аз вожделею следовати Тебе, Господи и Боже мой, даждь ми токмо прикоснутися Ти, да и аз воспою: Аллилуиа.

Икос 5

Принесоша отроцы халдейстии дары седящу на руку Девичу Создателю твари, мы же, руце имуще праздны от дел благих, како приступим к Сему, веры просяще, разве токмо апостола Фому поминающе и тако ему зовуще:

Радуйся, яко Господин жатвы призва тя;

Радуйся, яко в вертограде Того добре потрудился еси;

Радуйся, яко делатель и нива явился еси;

Радуйся, яко плод сторицею принесл еси;

Радуйся, яко со Владыкою дней утреневал еси;

Радуйся, яко чашу Христову испил еси;

Радуйся, яко и нощь просвещение ти бысть;

Радуйся, яко Господу Славы спрославился еси;

Радуйся, апостоле Фомо, неверованием добрым веру утвердивый.

Кондак 6

Проповедницы богоноснии бывше волсви, вопияше Фома, исповедаша Тя, Христе, яко Спаса всех; аще убо не уверую в Воскресение Твое, не явлюся ли убо и аз яко Ирод, не ведый пети: Аллилуиа.

Икос 6

Возсиявый во Египте Свет истины да разсеет, яко дым, вся сомнения наша: веруем бо, Господи, помози неверию нашему; ты же, апостоле, укрепи свидетельством твоим зовущия ти:

Радуйся, в сладость Христа послушавый;

Радуйся, во славу Его поживый;

Радуйся, с терпением Тому послуживый;

Радуйся, с веселием за Него умерый;

Радуйся, рану Прободеннаго осязавый;

Радуйся, Кровию Христовою искупленный;

Радуйся, копием мучительским прободенный;

Радуйся, кровь за Христа пролиявый;

Радуйся, апостоле Фомо, неверованием добрым веру утвердивый.

Кондак 7

Хотящу Симеону праведному умрети, вопияше Фома, вдался еси яко Младенец тому, но познался еси ему и Бог совершенный; сотвори убо, Господи, и мне тако, да абие воззову Ти: Аллилуиа.

Икос 7

Новое показа Творец снизхождение нам, на безсмертнем Теле смертныя язвы явити изволивый апостолу Своему, емуже с любовию взываем:

Радуйся, от Премудрости мудрость приявый;

Радуйся, от Любве любви научивыйся;

Радуйся, у Смирения смирению навыкший;

Радуйся, Благом во блазе утвержденный;

Радуйся, Терпением в терпении наставленный;

Радуйся, Кротости в кротости подражавый;

Радуйся, Послушанием к послушанию приведенный;

Радуйся, Сыном Отцу усыновленный;

Радуйся, апостоле Фомо, неверованием добрым веру утвердивый.

Кондак 8

Странное чудо вижу, вопияше Фома: дверем затворенным, яко дух, входит Христос, осязаю обаче раны и язвы Его, и что убо реку, токмо: Господь мой и Бог мой; что убо воспою, токмо: Аллилуиа.

Икос 8

Вси есмы в нижних и вышних никакоже достигаем, обаче веруем, яко оба соедини в Себе Господь, якоже яви сие апостолу Своему, от нас воспеваему сице:

Радуйся, с четверодневным Лазарем вечерявый;

Радуйся, любовию к неверию подвигнутый;

Радуйся, "осанна в вышних" вопиявый;

Радуйся, любовию уверение получивый;

Радуйся, воплощение Слова уведевый;

Радуйся, миром гонимый;

Радуйся, безсловесная плоти поправый;

Радуйся, мир от Христа приемый;

Радуйся, апостоле Фомо, неверованием добрым веру утвердивый.

Кондак 9

Всякое естество тварное вместити Божественное никакоже возмогает, вопияше Фома, Ты Единый оба неслитно и нераздельно в Себе сочетал еси, Тебе пою: Аллилуиа.

Икос 9

Ветии многовещаннии ничесоже приложити дерзают, апостоле, доброму исповеданию твоему: Господь мой и Бог мой; за сие и от нас приими сицевая:

Радуйся, яко нозе ко умовению Христу простерл еси;

Радуйся, яко дома на земли не имел еси;

Радуйся, яко нозе на путь мирен направил еси;

Радуйся, яко обитель в дому Отчи снискал еси;

Радуйся, яко строитель царский нареклся еси;

Радуйся, яко архитектон премудрый обрелся еси;

Радуйся, яко злато нищим раздал еси;

Радуйся, яко чертог Небесный царю воздвиг еси;

Радуйся, апостоле Фомо, неверованием добрым веру утвердивый.

Кондак 10

Спасти хотя мир, вопияше Фома, животворящею Кровию из прободенных ребр, Господи Боже мой, напоил еси вся, яже осязав, Тебе пою: Аллилуиа.

Икос 10

Стены Иерусалима Небеснаго на дванадесяти основаниих утвердишася, якоже едино от сих тя почитаем, апостоле славне, и тако ти восписуем:

Радуйся, яко язык огнен на тебе почи;

Радуйся, яко слава Христова тя осия;

Радуйся, яко языки многи просветил еси;

Радуйся, яко имя Христово прославил еси;

Радуйся, яко недужных исцелял еси;

Радуйся, яко мертвых восставлял еси;

Радуйся, яко и дуси повинувахуся ти;

Радуйся, яко имя твое написася на Небеси;

Радуйся, апостоле Фомо, неверованием добрым веру утвердивый.

Кондак 11

Пение всякое побеждается, вопияше Фома, тщащееся воспети славу Воскресения Твоего, Господи, обаче сие возвещу до последних земли, да всяк язык Истинному Богу зовет: Аллилуиа.

Икос 11

Светоприемную свещу зрим тя, апостоле славный, прикосновением к обоженной Плоти возжженную, темже приносим ти сицевая:

Радуйся, бисере ризы церковныя;

Радуйся, вертоградарю Истины;

Радуйся, кореню богословия;

Радуйся, цвете благочестия;

Радуйся, рождие лозы божественныя;

Радуйся, благоухание, приятно Богови;

Радуйся, златице, огнем очищенная;

Радуйся, весно целомудрия;

Радуйся, апостоле Фомо, неверованием добрым веру утвердивый.

Кондак 12

Благодать и жизнь пришедый дати всякой плоти, вопияше Фома иным учеником, не воздаст ли сия Подавшей Ему плоть? Обаче укажите мне гроб Ея, да со слезами воззову Богови: Аллилуиа.

Икос 12

Поюще Успение Богородицы, апостоли проводиша тя ко гробу Ея, и, вшед и обрет сей пуст, воздал еси хвалу Господу; темже зовем ти:

Радуйся, Божиею Материею возлюбленный;

Радуйся, ко прощанию Тою призванный;

Радуйся, яко матерь, Ю возлюбивый;

Радуйся, Божиим Промыслом удержанный;

Радуйся, на гроб Ея плакати пришедый;

Радуйся, камень от него отваливый;

Радуйся, радость велию людем открывый;

Радуйся, восстание Пречистой возвестивый;

Радуйся, апостоле Фомо, неверованием добрым веру утвердивый.

Кондак 13

О преславный апостоле Христов Фомо, малое сие приими от нас приношение и умоли за ны Господа Славы, да утвердившеся помощию твоею, обрящем и мы веры плоды благия, Творцу всяческих поюще: Аллилуиа.

(Этот кондак читается трижды, затем 1-й икос и 1-й кондак)

Молитва

О благознаменитый и славный апостоле Христов Фомо! Егда на конец веков к человеком пришедый Бог избра тя в ученики Своя и даде ти власть болящия исцеляти, прокаженныя очищати, мертвыя воскрешати, бесы изгоняти, ты не сих ради, наипаче любовию прилепился еси ко Христу, желанием вожделев даже до смерти следовати по Нем. Сего ради, аще попущением Божественным и не зрел еси со иными ученики воскресшаго Спаса, аще и отреклся еси веровати сему, дондеже вложиши перст свой в язвы гвоздинныя и вложиши руку свою в ребра Его, обаче исполни Господь прошение сердца твоего и непреложно паки веру твою утверди. Темже молим тя: отверзи нам очи веры, да плотским невидимая явятся нам; подаждь нам надежду на снизхождение Божие, да отчаяние греховное не пожрет ны; открый нам блаженство любве, яже крепка есть, яко смерть, и едина возмогает над тою, да поработавше Христу на земли, воздвигнем и мы себе кровы Небесныя и с тобою и всеми святыми прославим пречестное и великолепое имя Отца и Сына и Святаго Духа. Аминь.